1Cor 8 | ASO | STEP | Ido' longo' ma i-nidani' malo' nene soza o'moso ngimani' inite' naa' nemu' lo-lengemelosuve. Lingine mukito' nevo'mine inite' monovo danava gelaa' noune lani' nene mo lamineto' lani'za ve ma ingine la'lisete inite' monovo danava gelaa' unive ne none laa' nave nene engi' oko'ine di hozi li hokolize' igi minaa' nave. Ingine nene ne'mine igi minaa' naha ve ma ingine lu'ine evene' ngimaa' nave minani' nete nene hize ele' i-ngidi minaa' nave.

1 Corinthians 8

Paulo' Aza Soza O'moso Noso' Nite' nGimanguti' Izesu' Zuho Lingine Nene Ha Nalizado' O Neihe Lo Lo-ngimine'

1 Ido' longo' ma i-nidani' malo' nene soza o'moso ngimani' inite' naa' nemu' lo-lengemelosuve. Lingine mukito' nevo'mine inite' monovo danava gelaa' noune lani' nene mo lamineto' lani'za ve ma ingine la'lisete inite' monovo danava gelaa' unive ne none laa' nave nene engi' oko'ine di hozi li hokolize' igi minaa' nave. Ingine nene ne'mine igi minaa' naha ve ma ingine lu'ine evene' ngimaa' nave minani' nete nene hize ele' i-ngidi minaa' nave. 2 Ido' ve ma ingine inite' monovo danava gele osu' lo none li gilaa' nave ingine nene inite' gele vevesaa' monovo nene olihe gilamave. 3 Ne neine'za ve ma ingine O'moso lu'ine imaa' nave nene O'moso'mo engikumu' nene ei' ve lo ningo gele neive.

4 Ido' neloti' nene soza o'moso inite' ngimani' initekuti' naa' nemu' naza ti' lo noluve: A'mine soza o'moso nene inite' gihile minamani' nenako a'minete me misubou' inite' ma amilisave. O'moso ei' hamokovo' minine' nene neive li lingine lani' nene lamine' ve lo gele nouve. 5 Ee, evene' ma ingine O'mosote ve ido' Guvetesi ve ve lani' inite' okulumokukisi misuboukisi nene minani' neiha ido' a'mine soza o'moso ido' guve'inesi ve lili' igi minani' inite' nene lamine' mo vai' li minani' ve. 6 Ne'mini minani' neiha Kilisito' evenele zuho laza nene ti' lo gele none: O'moso ei' hamo' nene neive. Aza nene Meteho inite' mata' muki' do soto' ive ne neive. Ido' laza nene eze lulolo' ogo molo olone lo eito' lehete ogo minaa' unive ne neive. Ido' Guvelesi ve nene hamo' neive. A'mine ve Izesu' Kilisito' nene O'moso'mo eito' gele medele mino inite' mata' muki' nesi ido' leli' nesi do soto' ive ne neive.

7 Ne'mine ve neingumu' nene leli' ha gele none' nenako soza o'moso nene inite' gihile nizamaze. Nemu' nene evene' linge ma lingine soza o'moso ngimani' noso' nitekuti' nalone' nene goloso amoloseive laa' nani'za lengita Izesu' evenele ma nete nemu' olihe gili lamine' amave. Ingine nene gamene gala'mudati' vomine soza o'moso nene inite' gihile ve li ngopo'ni li minaa' ani' nenako nemu' nene ingine idisesi soza o'moso ngimani' noso' nitekuti' nalizani' nene a'mine o'moso ngopo'ni nolune li gilisa nalisave. Ido' ne'mine ilizani' nene lu'ine gilizevo o vine' miningu' nene gili vevesamanako nemu' nene ingine a'minguti' ma nalisa gili laza nalone' nene soza o'moso opo'ni lune' gelavo mo lihime dalosune'za nevo ha nalosune li gili nalizani' ne'mo nene ingine lihime dani' gelavo lengi' zuho nene ngele'mize goloso ilisave. 8 Ne neine'za noso' nite' naa' ido' namaa' monovote ne'mo O'moso'mo lelikumu' gala giline' nene ma do ato' amoloseive. O'moso'mi velelo' noso' nite' ma nalone' ne'mo do lamine' o-ledamo ido' malise ogo namolone' ne'mo nene ma do goloso o-ledamoloseive. 9 Ne neiha soza o'moso ngimani' noso' nitekuti' nene ha nalonido' o neihe li nemu' gili lingine nalizani' ne'mo evene' ma ingine monoku' gilizevo ne'mine gili minani' nene monokuti' limi ingikelizaze. Monovotido' nene gizebo lamine' ilo. 10 Ne'mine noluvoni' nene nemu' noluve. Gaza Izesu' evenele malike, soza o'moso nene inite' gihile nizamani' nenako nemu' nene soza o'moso ngimani' inite' nene ha nalosune lo gele nanivelike, soza o'moso'mi mono' numu'veu' mino noso' nite' no nanivo ve ma lulouko mono' gele guno amive aza soza o'moso ngimani' inite' naa' nene goloso ve lo gelaa' noilive mali'mo ningo ehelele izaa' ine' ma nene ehelele izamivo ha vo naloseive. 11 Ido' ne'mine iline' nene goloso inite' dalosuve lo gelo vo no lulo do goloso oloseinako ne'mo mono' gele guno amive geze zuho eikumukisi Kilisito' aza nene hiline' nenako a'mine geze zuho ma nene do goloso o-do gaza soza o'moso ngimanguti' nene ha nalosune lo gelaa' anidi'mo mo aka golosolo' ele'mize molane. 12 Lingine ne'mine iga' nani' ne'mo lingine zuho ma monoku' lu'ine gilizevo o vine' nene di goloso i-ngidi lihime mili-ngidaa' nani' nene Kilisito'nisi lihime mili-daa' nave. 13 Nemu' nene lingine olodi'mine igi minilizangisi naza soza o'moso ngimani' noso' nite' ma naloni' nene neze zuho ma lihime akau' vikelizave lo a'mine ize nevo'minguti' nene namo mino helelosuve.